Succesfestival

Så var landsfestivalen for kor 2005 i Alta over. Arrangementet vart svært vellukka, og me har berre fått gode tilbakemeldingar. Les også kva Ingrid Danbolt i Norges korforbund skriv. Det spørs no likevel om det vert noko pengar att i kassen etter at alle rekningane er betalte. Uansett synes eg det var verdt strevet, og eg håpar at korlivet i Alta har fått ein "puff" oppover, og eit godt samarbeidsklima å byggja vidare på. Som sekretær i Alta Motettkor og meldem i festivalkommiteen, må eg få lov å berømma alle som stod på seint og tidleg både med planleggjing og gjennomføring av festivalen. Salar og bord skulle pyntast, vaktlister, festivalprogram og menyar planleggjast berre for å nevna noko.

Me opplevde nokre flotte festivaldagar, og tonen vart slegen an i opningskonserten som vart verdig leida av Dankert Røst. Her opna felleskoret med "Kølvann" får det det eine høgdepunktet fylgde etter det andre. Etter opningskonserten bar det avgarde til båthavna og St.Hansfeiring med bål og dans og grilla laks. Regnet haldt seg heldigvis borte heilt til over midnatt, sjølv om det var litt vind.

Fredagen starta med eit forrykande seminar med Sidumo Jacobs, før lunsjkonsert og seminaret haldt fram. På kvelden var det kyrkjekonserar og deretter midnattskonsert med festivalkoret Vokal Nord frå Tromsø. Det var ei gripande stund, og koret framførete mellom anna Jesu Meine Freude på ein glitrande måte.

Laurdag starta Magnar Mangersnes eit heilt anna slags seminar enn Sidumo, og her var det refleksjon og omtanke som stod i fokus. Mangersnes brukte Vokal Nord for å illustrera det han hadde på hjarta, og ivrige tilhøyrarar fekk ta del i litt av det som ligg bak ei god framføring. Koret gjekk mellom anna gjennom Våren av Grieg og I midnattsolen på ein måte som få hadde høyrt tidlegare. Seinare på dagen var det lunsjkonsert og på ettermiddagen framførte Vokal Nord ein flott konsert i kultursalen. Til slutt bar det opp i Alulaen kor det var dekka til bankett, og festivalen vart offisielt avslutta.

Søndag tok over 170 vegen opp til Skårdalen i Øvre Tverrelvdalen på friluftsgudstjeneste, og saman med Hareid Mannskor og ein litt forskremt fjellvåk fekk me ei flott oppleving.

Mandag hadde Motettkoret semesteravslutning saman med Hareid Mannskor i Alta Friluftspark, og det var stort å stå der saman med det andre koret og synga "Høgt frå den himmelske klåra" dirigert av komponisten Johan H. Grimstad sjølv.

Landsfestival for kor i Alta

23.-26. juni skal Alta Motettkor væra med å arrangere Landsfestivalen for kor 2005. Det er Finnmark fylkesledd av Norges korforbund som står bak, og me gler oss til at kor fra heile landet kjem til Alta St.Hans-helga.

Det er litt av eit strev å vera med på eit slikt arrangement, og mange kommitéar har vore i sving med planleggjing i eit heilt år. Eg er med i Hovedkommiteen og PR-gruppa, og har ansvar for websider, avisannonser, trykkjing av program med meir. Eg har også tenkt å ta ein del bilete både under førebuingane og sjølve festivalen, og leggja nokre av dei ut på Alta Motettkor sitt Flickr fotoalbum og på festivalen sine websider.

Bestefar 100 år

Bestefar er 100 år 10.juni 2005. Han må vera Norges sprekaste bestefar, alderen tatt i betraktning, og ved eit slikt høve måtte det feirast. Heile familen var samla på Manger, og det var både tale frå ordførar og helsing frå kongen.

I avisa Nordhordland var det ein svær artikkel på 2 sider om "Den første Radværing fødd fri" ettersom bestefar vart fødd første dagen etter at Noreg vart eit fritt land frå union med Sverige.

Sjå fleire bilete frå feiringa

Lakseklondyke

Det var reine klondykestemning i Kåfjord i dag, etter at 90.000 laks er rømt frå eit oppdretsannlegg fredag. Me tok ein biltur innover søndag ettermiddag, og eg er sikker på at det var mist 2-300 personar som stod og fiska eller grilla, eller som stod og såg på at andre fiska og grilla innerst i fjorden. Folk stod tett i tett, noko dette bilete frå brua innerst i Kåfjord utover mot Kreta viser. Mange vart observerte på veg tilbake til bilane med smålaks på ca ein kilo i bæreposar.
Ut og inn av småbåthavna har det også vore eit yrande liv i helga, og båtar har omtrent gått i stim til Kåfjord. Sjølv prøvde eg med eit trollgarn fredagskvelden, men utan restultat i form av blankfisk. To ringnotsnurparar er på leiting etter restane av den rømde fiskestimen, men det er tydeleg at ein god del har funne vegen inn i Kåfjordstraumen.