Morgonstemning ved Rondane

Ja, slik kan utsikten mot Rondane ta seg ut dersom du tek ein tur til Venabygdsfjellet på sjølvaste julafta, akkurat i det sola kjem opp.

Til venstre ser me Storesmeden og Veslesmeden, og til høgre Rondeslottet. Området mellom dei skogkledde åsane på Vanabydsfjellet og Rondane er eit flott turtereng på ski. Til vinterferien og påske vert det køyrd milevegs med preparerte løyper, så spenn på deg skia.

PS: Bilete er teke ved foten av Kyrkjegardsfjellet, ikkje langt frå hytta vår.

huglo.net

Huglo fått si eiga offisielle nettside: www.huglo.net kor øya og det som skjer der vert omtala. Det er Huglo Bygdalag som står bak publikasjonen, og sjølv om den ikkje er heilt ferdig endå ser det veldig bra ut så langt. Håpar dei som står bak legg til rette for at det kan verta ei dynamisk side som både turistar, fastbuande og utflytta huglarar kan ha nytte av. Eg tilhøyrer vel den siste kategorien.

Det står litt av kvart om Huglo på Internett frå før, sikkert mykje meir enn det eg klarar å finna. Eit søk med Google Blogsearch etter Huglo i asbjorns blogg kan jo vera interesant nok for dei som orkar prøva, det står også ein god del om Huglo på pappa si heimeside. På nettleksikonet Wikipedia er det allereide lagt inn ein artikkel om Huglo, så her er det berre for andre skrivelystne å fylgja opp med meir stoff. Ellers gjev eit generelt søk på norske nettstader etter Huglo svært mange treff - det er tydeleg at det skjer litt av kvart på øya.

Årets juleplate

"Den store stjerna" frå Alta Motettkor vert kanskje å finna under mange juletre i år. Koret har tidlegare gitt ut tre plater, og den fjerde vart det ei ekte juleplate med englar og stjerner på coveret. Eg har vore med på tre plateutgjevingar, og det er like kjekt og spennande kvar gong. På motettkoret sine heimesider som eg puslar med i ledige stunder, kan du finna og faktisk også høyra på alle utgjevingane.

"Den store stjerna" er ei fin samling med både nye og gamle julesongar, og mykje av materialet på plata er skreve eller arrangert spesielt for Alta Motettkor. Ann-Beth Solvang som har vore med i koret tidligare er solist på denne plata, akkurat som på de forrige. Ho har jammen utvikla seg og har ei fantastisk flott stemme. Me gler oss masse til ho kjem oppover og blir med på julekonserten i år, den 11.des i Elvebakken kirke, og 12.des i Øksfjord kirke.